ومن عادت المصرين أن حتي الكلام والأمثال الشعبيه بتتورث 😂وطبعا زي كل حاجه في حياتنا ليها اصل كمان الامثال دي ليها اصول 🙂
يعني مثلا عندنا مثل زي 👇🏻
"اللي اختشوا ماتوا" كتير مننا سمع عن أصل المثل ده
من المعروف أن كان في مصر والشام زمان حمامات عامه بتروح ليها الناس للإغتسال والاستحمام والحمامات دي مكنش حد بيدخلها غير بالفلوس وليها حد يشرف عليها وينظم الدخول ويحفظ الملابس ، وفي يوم حصل حريق في حمام وبعض من الناس اللي كانت موجوده في الحمام خرجوا خايفين وهما عراه مخجلوش من عوراتهم أما اللي خجلوا واستحوا فضلوا في الحمام وفضلوا الموت ع أن الناس تشوف عوراتهم وفعلا ماتوا وده اللي قاله صاحب الحمام لما اتسأل"هل مات حد في الحريق ده" أجاب بنعم "اللي اختشوا ماتوا"
فبقي مثل شعبي لحد يومنا ده🙃
وفي مثل تاني "آخر خدمه الغز علقه"
والحكايه هي أن "الغز" هي اختصار لكلمه "الاوغوز" ودول جماعه تركيه كانوا بيساندوا المماليك وبتعاونهم في الخراب ، كانوا لما يحتلوا قريه يخرجوا أهلها ويجبروهم ع الشغل عندهم وخدمتهم لكن مكتفوش بالخدمه وذلهم وبس لا دول كمان كانوا بيسرقوا منهم الاكل والشرب بدون مقابل وبعد ما تنتهي إقامتهم في القريه وهيمشوا يضربوا الأهالي الي خدمتهم ويسيئوا معاملتهم كنوع من التجبر وفرض السيطره
فبقي المصريون يضربوا بيه المثل في كل زمن 🙃
مثل كمان زي "تروح فين يا صعلوك بين الملوك"
والمقصود ب"الصعلوك "هو الشيخ المصري "زعلوك" الي كان موظف حسابات لواحد من مماليك ضحايا مذبحه القلعه ، ولسوء حظ الشيخ "زعلوك" أنه وقت المذبحه كان مرافق لعمال الملوك وكان قريب منهم واتقتل معاهم بالغلط في المذبحه وبعد المعركه وموت ٧٤٠ مملوكي في القلعه ، كان امير لجنه حصر القتلي بيدون اسماء الضحايا واتفاجأو بوجود جثمان الشيخ زعلوك بينهم والقصه انتشرت بين المصريين وكان بيقولوا "تروح فين يا زعلوك بين الملوك" لحد ما وصل الأمر ل "محمد على" الي منح لورثه الشيخ "زعلوك" آلاف المواشي ومئات الافدنه ناحيه دسوق تعويض لموت الشيخ ، وبعد كده اتحرف المثل من "تروح فين يا زعلوك بين الملوك" الي "تروح فين يا صعلوك بين الملوك"
وطبعا في أمثال تاني كتير جدا ليها اصول وحكايات🤭