النهارده هنتكلم وهنعرف حكايه اشهر ست في تاريخ مصر "الملكه حتشبسوت"
هي ملكه من الاسره الثامنه عشر بنت الملك "تحتمس الاول" والملكه"احمس" وزوجه الملك "تحتمس الثاني" الاخ غير الشقيق ليها ومأنجبتش منه غير بنت واحده وهي "نفرو رع" ، وبموت تحتمس الثاني سنه ١٤٧٨ ق.م أصبحت الخلافه ع العرش من حق ابنه "تحتمس الثالث" اللي انجبه من "إسيت" وحده من زوجاته الثانويه ، لكن الابن "تحتمس الثالث" واللي اتجوز بحكم الأحوال من الاميره "نفرو رع" كان لسه طفل صغير وللسبب ده أصبحت "حتشبسوت" وصيه عليه حسب الاعراف والتقاليد ، لكن طموح حتشبسوت خلاها تحول الوصايه دي الي مشاركه دستوريه في الحكم ، وقبل العام السابع من حكم الملك"تحتمس الثالث" توجت "حتشبسوت" نفسها واتخلت عن أنوثتها ولبست ملابس الرجال والدقن المستعارة واتشبهت بالرجال وبالرغم من أنها قابلت اعتراضات كتير من الكهنه إلا أنها أثبتت أنها أحق بالحكم لأنها بنت ملك وزوجه ملك ودمها ملكي ١٠٠٪ وكمان دعمها كهنه الإله "آمون" وقالو أن "حتشبسوت" هي الي اختارها الإله للمنصب ده بالاضافه كمان أنها قدرت تكسب ولاء بعض الناس المخلصين في الدوله
ومن إنجازاتها أنها تممت السياسيه الي بدأت منذ طرد الهكسوس من البلاد ، واعادت بناء المعابد اللي اتسابت شبه مهمله من عصر الهكسوس زي معبد "إسطبل عنتر" ، واهتمت بمدينه طيبه الي كانت مقر الاسره فأهتمت بمعبد الأله "مونتو" وبالطريق الخاص بالمواكب بين معبدي الاقصر والكرنك وهيكل المركب المقدسه اللي بيسمي "المقصوره الحمراء" ، وكانت كمان مشغله المحاجر والمناجم بشكل مكثف وده كان بيوفر المواد اللازمه لبناء وتشغيل المعابد وكان ليها علاقات تجاريه كويسه مع المراكز الاجنبيه خصوصا بلاد "بونت" وموجود تفاصيل الحملات للبلاد دي موضحه في نصوص ونقوش ع جدران معبد "الدير البحري"
اتلقبت "حتشبسوت" بألقاب كتيره جدا منها اللي منقوش ع جدران معبدها في الدير البحري ومعبد الكرنك وأماكن تاني كتير ومن القابها ( ملك الصعيد والدلتا _ ابنه الشمس _ صديقه امون _ حورس الذهبي _ مانحه السنين _ هازمه جميع البلاد _ السيده القويه )
ومن مومياء "حتشبسوت" اكتشفوا أن علامات موتها طبيعيه وان سبب موتها راجع لمرضها بالسرطان أو السكر ، وقبر حتشبسوت موجود في وادي الملوك وله رمز KV20 وقدر المؤرخ المصري "مانيتون" فتره حكماها ب ٢١سنه و٩ شهور
بس في سؤال دايما بيتسال عن حياه "حتشبسوت"
_ هل فعلا كان في قصه حب بين الملكه "حتشبسوت" والمهندس "سننموت" ؟!
"سننموت" كان لغز مثير في حياه "حتشبسوت" وهو المهندس اللي بني معبدها المشهور في الدير البحري وهو كمان الي كان مسؤل عن تربيه وتعليم بنتها الاميره "نفرو رع" واكتشفوا أن "سننموت" حفر نفق بين مقبرته ومقبره الملكه بحيث أنه يكون قريب منها زي ما كان قريب منها في الحياه الدنيا وفي بعض المؤرخين لمحوا ع أن كان موجود حاله حب جمعت بين "سننموت" و "حتشبسوت" بعد وفاه زوجها ولكن ده غير مؤكد .