المطبخ المصري عندنا مبيخلاش من الاكلات الي ليها اصل بشخصيات أو احداث تاريخيه مهمه وبالرغم من أن المصريين معتزين بالاكلات دي جدا إلا أن كتير مننا ميعرفش تاريخ الاكلات دي ومن أشهرها "أم على" 😍👀
"أم على" هي نوع من الحلويات اتسمت ع اسم الزوجه الاولى للسلطان المملوكي "عز الدين أيبك" اللي مسمعناش ليها اي اسم غير "أم على"
لما اتجوزت الملكه "شجر الدر" بعد وفاه جوزها السلطان "نجم الدين أيوب" من الامير المملوكي "عز الدين" اللي كان متجوز وعنده ابن اسمه "على" أظهر قدام شجر الدر أنه نسي أسرته، إلا أن بمرور الأيام حن لقديمه ورجع يزور زوجته وابنه "على" حتي وصل تفكيره في اعلان زوجته الأولى "أم على" ملكه ع مصر بدل "شجر الدر" وده أشعل الغيره داخل "شجر الدر" اللي قررت الانتقام لنفسها وأجرت حد يقتل "أيبك" وافتكرت أنها كده اتخلصت من المشاكل وانتقمت لكرامتها ، لكن هنا قررت "ام على" أنها تضرب عصفورين بحجر واحد بأنها تاخد ثأر جوزها المقتول وتنتقم من "شجر الدر" في نفس الوقت ودي حادثه سجلها التاريخ من أغرب وقائع الانتقام بين الضرائر 🤐، جمعت "أم على" عدد من جواريها ودخلت ع "شجر الدر" حمامها وضربوها بالقباقيب الخشب لحد ما ماتت ، وراحت "أم على" عملت كميات كبيرة من حلو هي صنعته من الرقاق واللبن المحلي بالسكر ووزعتها ع الناس في الشارع ، وعشان مكنش حد عارف للحلو ده اسم فسموها ع اسم صاحبتها "أم على" 😋